ငွေသာတွင်း။ ။ ဇူလိုင် ၁၀၊
စစ်ကိုင်းတိုင်း၊ ကနီမြို့နယ်၊ ငွေသာတွင်းရွာတွင် ငွေသာတွင်းရွာဆရာတော်ဘုရာကြီးအား ကျေးဇူးတုံ့ဆပ် ပူဇော်သောအားဖြင့် တပည့်သံဃာများ၊ တက်ကြွသောလူုငယ်များဖြင့် စုပေါင်းဖွင့်လှစ်ထားသော ဘ၀ဘဏ်စာကြည့်တိုက်သည် ယခုအခါ (၉၅) ရာခိုင်နှုန်းပြီးစီးနေပြီဖြစ်ပါသည်။
ထိုကဲ့သို့ ပြီးဆီးနေသည့်အချိန်မှာမှ ကနီမြို့နယ် ပြန်ကြားရေးနှင့် ပြည်သူ့ဆက်ဆံရေးဌာနမှ တာဝန်ရှိသူအချို့က လာရောက်၍ ဘ၀ဘဏ်စာကြည့်တိုက်အား လင်းလက်ကမ္ဘာစာကြည့်တိုက်အမည်ဖြင့် ဖွင့်လှစ်လိုကြောင်း၊ ၄င်းနာမည်ဖြင့် မှတ်ပုံတင်ကျပြီး ဖြစ်ကြောင်း ငွေသာတွင်းရွာ ဆရာတော်အား လာရောက်လျှောက်ထားသည်ဟု ဆိုပါသည်။ ဆရာတော်ဘုရားမှ ဤစာကြည့်တိုက်ကိုပိုင်သူမှာ သူမဟုတ်ကြောင်း၊ သူ့ကို ဦးတိုက်၍ ဆရာ့ကျေးဇူးကို ရည်ရွယ်ဆောက်လုပ်ထားခြင်းသာဖြစ်ကြောင်းနှင့် တပည့်ရဟန်းရှင်လူများသာ ပိုင်ဆိုင်ကြောင်း မိန့်ကြားလိုက်သည်ဟု သိရပါသည်။
ဤသတင်းနှင့်ပတ်သက်၍ သက်ဆိုင်ရာစာကြည့်တိုက်တာဝန်ခံသို့ ဆက်သွယ်မေးမြန်းခဲ့ရာ စာကြည့်တိုက်တာဝန်ခံမှ ဤသို့ ဖြေကြားခဲ့ပါသည်။ .......
နာမည်လာပြောင်းခိုင်းတာ ဟုတ်ပါတယ်။ ကျွန်တော်တို့ယူဆထားတာက ဒီစာကြည့်တိုက်ဟာ ဆရာသမားကျေးဇူးဂုဏ်ရည်ကို ဦးတိုက်ပြီး ကလေးငယ်တွေအတွက် ရည်ရွယ်ထားတဲ့ စာကြည့်တိုက်၊ တကယ်လို့ အကြောင်းတစ်စုံတစ်ရာကြောင့် ဆရာသမားလက်ထဲမှာ၊ ရပ်ရွာပြည်သူလူထုလက်ထဲမှာ မရှိတော့ဘူးဆိုရင် စာအုပ်တွေကို အလှူရှင်တွေအားလုံးထံ ပြန်အပ်နှံသွားပါ့မယ်။ အဆောက်အဦကိုတော့ ကျွန်တော်တို့ ဆရာတော်ကို ရေစက်ချလှူဒါန်းသွားမယ်လို့ ဆုံးဖြတ်ထားပါတယ်။
တကယ်တော့ဗျာ ဒီစာကြည့်တိုက်နာမည် ဘ၀ဘဏ်ဆိုတာ ကျွန်တော်တို့ အလှူခံဖြတ်ပိုင်းတွေ၊ အသင်းဝင်ကဒ်တွေအားလုံး ပုံနှိပ်ပြီးသားဖြစ်သလို၊ ဂျာနယ်မဂ္ဂဇင်းစာမျက်နှာတွေပေါ်ကနေလည်း ကြော်ငြာတာတွေ၊ အလှူခံတာတွေ လုပ်ပြီးသားလေ။ ရန်ကုန်လေထန်ကုန်းအသိုင်းဝိုင်းဆိုရင်လည်း ကျွန်တော်တို့ ရွာက စာရေးတာဝါသနာပါတဲ့သူ အခံရှိနေတော့ တော်တော်များများသိပြီးသားလေ။ အခုမှဗျာ သူတို့က..................
သက်ဆိုင်ရာလည်း သူတို့ဘာသာ သီးသီးသန့်သန့်ပဲ စာကြည့်တိုက်လုပ်စေချင်ပါတယ်။ အဲဒါဆိုရင် ရပ်ရွာပြည်သူလူထုက ကိုယ့်ဘာသာကိုယ် ကိုယ်ကြိုက်တဲ့စာကြည့်တိုက်ကို လွတ်လပ်စွာ ရွေးချယ်ဖတ်ခွင့်ရှိသွားတာပေါ့။ ပြီးတော့ ဒီစာကြည့်တိုက်မရှိတဲ့စာအုပ် ဟိုစာကြည့်တိုက်မှာ ရှိကောင်း ရှိနိုင်တာပေါ့။ ကျွန်တော်တို့ စာကြည့်တိုက်ကိုတော့ နွေရာသီယဉ်ကျေးမှုသင်တန်းတွေ၊ ကွန်ပျူတာသင်တန်းတွေထိ ရေရှည် Long Team ရည်ရွယ်ချက်တွေ ရှိပါတယ် ဟု ပြောဆိုသွားပါသည်။
ဒီကျွန်တော်တို့စာကြည့်တိုက်လေး ကိုယ်ထူကိုယ်ထ ဘ၀လေးနဲ့ လွတ်လပ်စွာရှင်သန်နိုင်အောင် ဘလော့ဂါမောင်နှမတွေအားလုံး ၀ိုင်းဝန်းအကြံပြုပေးနိုင်ပါကြောင်း ဖိတ်မံအပ်ပါတယ်။
No comments:
Post a Comment